Freelance diseinatzaile industriala naiz (estudioak ditut Elisavan eta Central Saint Martins Colledge of Art and Design-en). Arlo profesionalean hagitz aktiboa naiz, hainbat enpresarekin (Camper, BD Barcelona, Metalarte, Zicla, Mahou...) eta programa sozialetan inplikaturik dauden fundazio eta elkarteekin (Arrels Fundació, Fundació Tot Raval, Fundació Impulsem, Fundación San Martín de Porres, We Are Water Foundation…) garatutako proiektuak lantzen baititut. Izan ere, sarritan bi "taldeak" elkarrekin jartzen dituzten proiektuak garatzen ditut.

Arlo horietan, nire interesik handiena, hots, nire diseinu-ikerketaren eremurik garrantzitsuena, ondoko hau da: gizakiek (bereziki egoerarik ahulenean diren gizakiek) beren ingurunea definitu eta eraikitze aldera beren inguruabarrak (edozein direlarik ere) aprobetxatuz parte hartzeko duten moduari buruzko esplorazioa. Hori guztia, funtsean, bi gairi buruzko galdera eginez: alde batetik, diseinuak nola bultza ditzakeen ahalduntzea eta jarrera emantzipatzaileak, eta bestetik, diseinuak nola sor ditzakeen loturarik ez duten taldeen arteko estekak eta konexioak.

HITZALDIA

Amildegira jauzi egitea... Eta min handirik ez hartzea.

"Diseinuaren arloko" proiektu txiki batzuetan inplikaturik dauden prozesu eta eragileei buruz (eta berorien rolei buruz).

"Beste errealitate desiragarriago baterako" egungo trantsizio-egoeratik abiatuta, zenbait proiektu aurkeztuko dira, norabide horretan joan nahi duten gaiak, testuinguruak eta estrategiak aztertzen dituztenak. Adibide argigarri "arrakastatsu" gisa agertu beharrean (baten bat argi eta garbi kontrakoa balitz bezala ikus baitaiteke), aztertzen dituzten alderdiak zalantzan jartzeko kasu eta bitarteko kritikotzat hartuko dira. Proiektu horiek guztiek, goitik-behetik komunean izan lezaketen elementuetako bat organismoen, inguruabarren eta dimentsioen arteko harremanak eta kontaktuak ikertzeko borondatea da, kontuan hartuta alderdi horiek, agian, aurretik ez zeudela elkarri oso lotuta (edo kontuan harturik, zuzen adierazita, ez zeudela inola ere elkarrekin lotuta). Horretarako, arreta berezia jarriko da inplikaturik dauden eragile guztiak eta horien rolak ikusarazteko.

2006an sortu zen emakumezko arkitekto-talde sortzailearen kideak gara, eta Hirigintza, Arkitektura, Diseinua eta Ikerketa arloetako proiektuak lantzen ditugu. Pertsonek ingurumenean duten eragina minimizatzea, gizarte-garapena, eraikuntza-teknika berritzaileak eta lankidetza- eta partaidetza-testuinguruak sorraraztea sustatzen duten espazioak eta programak diseinatzen ditugu. 

Proiektuak, erakusketak, hitzaldiak eta mintegiak egin ditugu zenbait arte-erakunde eta irakaskuntza-erakundetan, Europan, Estatu Batuetan, Latinoamerikan eta Txinan. Gure 'Ciudad Biótica Agroplaza' izeneko proiektua Veneziako Arkitekturako 17. Bienaleko Espainiako Pabiloian izan da ikusgai, eta finalista izan da 'Arquia Próxima 2016' sarian. "Inteligencias Colectivas" izeneko proiektua erakutsi dugu New Yorkeko Museum of Modern Art-en, 2015ean; ‘Bilbao Commons como Colectivo Residente’ deritzon proiektua garatu dugu Azkuna Zentroan; Espainiako Arkitektoen Kutxaren "Arquia Próxima 2012" lehen saria jaso dugu; Karibeko Arkitekturaren VIII. Bienalean ere saria jaso dugu, Eraikitako Hiri Proiektu gisa, eta lehen saria jaso dugu Santo Domingoko XI. Arkitektura Bienalean ere (Paisaiari dagokion kategorian). 

HIRI BIOTIKOA / AGROPLAZA

Pezestudioren ikerketa-ekintza lerro bat dugu Hiri Biotikoa, zeinaren helburua baita hiriak elkarlanean eraldatzea, pertsonen bizi-kalitatea hobetzeko, bizitza eta aniztasuna erdigunean jarriz. Ekintza sortzaile, sozial eta inklusiboen bidez eraikitzen da, herritarren parte-hartzearen, feminismoaren eta ekologiaren bidez.
Hiri Biotikoaren baitan Agroplaza garatu dugu, espazio publikoak eraldatzeko metodologia bat, zeinak erabiltzaileak beren artean eta ingurumenarekin lotzen dituen. Agroplaza leku bakoitzari lotutako agente erabiltzaileak inplikatzen dituzten partaidetza-prozesuen bidez garatzen da. Proiektuaren bidez, baliabideak eta energia aurrezten dituzten, biodibertsitatea areagotzen duten, hiri-ingurunean bizirik dauden komunitateak barne hartzen dituzten eta jarduera komunitario eta berritzaileak sortzen dituzten espazio eta azpiegiturak gauzatzen dira. Agroplaza Agronautas laborategi esperimentalen bidez diseinatu da: hogei bat prozesu izan dira, eta 2011. urteaz geroztik penintsulako (Bilbo, Madril, Bartzelona, Malaga, Alacant), Europako (Reykjavik, Paris) eta Amerikako (Lima, New York) hainbat komunitate inplikatu dituzte. Agroplaza Getafeko Alhondiga auzoan (2015) eta Bilboko Kirikiño plazan (2020) ezarri da. 2016ko Arquia Próxima sarietan finalista izan da, eta Veneziako Arkitektura Bienalaren (2020-2021) Espainiako pabiloian ikusgai jarri da.

Basque Design Center -BDC- ekonomia zirkularrari aplikatzen zaizkion teknologia eta diziplina berriak garatzea xede duen zentroa da, birsorkuntzarekin loturik dauden egineren ikerketaren bidez. Naturak eta organismo biologikoek inspiratutako biodiseinuko estrategiak aztertzen dira, berrikuntzaren eragile gisa, etorkizun holistiko eta iraunkorrago baterako trantsizioa bultzatuz.

Ekimen honen helburua tokiko enpresen lehiakortasuna hobetzea eta Gueñesko landa-garapen iraunkorreko gune handia sendotzea da. Zentro berri honek diseinu iraunkorra ezagutu eta aplikatzeko bidea emango du, zenbait jardueraren bidez (masterclass, tailer eta ekintzailetzaren arloetako ekimenak). Gure komunitateko kide diren ikasleak, startup-ak eta ekintzaileak aitzindariak izango dira biodiseinuaren arloan azaleratzen ari den diziplinan, eta irtenbideak proposatuko dizkiete gaur egungo erronkei, hala nola klima-aldaketari, kontsumo txikiko fabrikazioari, baliabide naturalen murrizketari, giza osasunari eta ingurumen-osasunari dagozkien alorretan.

Materioteka, Bio Lab eta FabLab bezalako baliabide aurreratuekin, BDCk diseinatzaile profesionalak eta prestatzen ari direnak sartuko ditu diziplina anitzeko pentsamenduaren arloan, eta bai biomimetismoaren, diseinu bio-konputazionalaren, teknika digitalen eta bio-fabrikazioaren abiaburuetan ere. Material berrien diseinuari, ehungintzari, produktu eta altzariei, zerbitzuei, sistemei eta proposamen arkitektoniko iraunkor eta birsortzaileei aplikatutako garapen- eta ikerketa-laborategi bat izango da.

Adele Orcajada
Adele ikertzailea, liburuzaina eta materialen komisarioa izan da 2014tik, eta freelance aholkulari gisa lan egin du MaterialDrivenen bazkide egin aurretik, non marka eta erakundeekin materialen berrikuntza aztertzen jarraitzen duen. Adele Central Saint Martinseko graduatua da, eta eskarmentua du moda-osagarrien diseinatzaile eta product developer gisa, fast fashion enpresekin, diseinatzaile artisauekin eta bidezko merkataritzako ekimenetan lan egin baitu. Moda eta diseinu eskolak eman ditu Espainian eta Erresuma Batuan, hala nola, IED, Esne, Central Saint Martins, Royal College of Arts-en eta Kingstonen. Fashion Revolution, The Festival of Making, London Design Week eta London Craft Week bezalako ekitaldietan ere parte hartzen du. Ekitaldi horietan, abangoardiako gaiak azaltzen ditu, hala nola materialen berrikuntza, iraunkortasuna eta ekonomia zirkularra. Horrezaz gainera, haren Embodying the Invisible saiakera Laundry Arts Service-ren The Slow Grind-en argitaratu berri dute. Adelek Parsons NYren Healthy Material Lab ziurtagiria du, material osasungarriei eta eraikin iraunkorrei dagokien alorrean. Gaur egun, biodiseinua, teknologia eta material iraunkorren garapena lantzeko gunea den Bilboko Basque BioDesign Center-en zuzendari akademikoa da Adele.

DREAM PAINTER - VARVARA & MAR

Dream Painter instalazio robotiko interaktiboak margolan kolektibo bihurtzen ditu jendearen ametsak. Artelanak hainbat zati dauzka: interakzio-estazioa, robot margolaria eta ahozko hitza oihal gaineko artelan bihurtzen duen kodeketa sortzailea.

Guztiok egiten dugu amets. Goizetan, batzuetan, ametsak gogoratzen ditugu; beste batzuetan, berriz, desagertu egiten dira, besterik gabe. Sarritan, ozta-ozta ulertzen dugu amaierara arte gogoratzen duguna. Sigmund Freud psikoanalista ezaguna giza inkontzientea ulertzen saiatu zen, ametsak aztertuz. Freud sinetsita zegoen ametsen munduak giza adimena ulertzeko orduan sekulako ahala zuela. «Ametsen interpretazioa» liburu ospetsuan, honako hau baieztatu zuen: «Ametsen interpretazioa da adimenaren jarduera inkontzienteak ezagutzeko benetako bidea». (Sigmund Freud, 1899)

Lanak hainbat kontu garrantzitsu planteatzen ditu; hala nola, hauek: Makinek gure inkontzientea uler dezakete? Zer gertatuko litzateke, algoritmoak gure ametsei zentzua emateko edo geure burua guk geuk baino hobeto ulertzeko gai izango balira? Badago konfiantza-mugarik gizateriaren eta teknologiaren artean?

Tabakalerak eta Teknikerrek egin dute Dream Painter.

Varvara & Mar

Varvara Guljajevak eta Mar Canet-ek 2009an osatutako artisten duoa da Varvara & Mar. Beren lanean, gizarte-aldaketak eta teknologiaren garaiaren inpaktua jorratzen dituzte. Varvara & Mar liluratuta daude zinetikarekin, parte-hartzearekin eta fabrikazio digitalarekin, eta beren lanaren zati dira.

Nazioarteko hainbat erakusketatan erakutsi dituzte beren artelanak; hala nola, MADen (New York), FACTen (Liverpool), Santa Monican (Bartzelona), Barbican-en eta V&A Museum-en (Londres), Ars Electronica Museum-en (Linz), ZKMn (Karlsruhe) eta askoz ere toki gehiagotan.

Varvara (Tartu, Estonia) Arteko doktorea da, Estoniako Arteen Akademiaren eskutik. Halaber, bitarteko digitalei buruzko master bat egin zuen Alemaniako Luebeck Unibertsitatean, eta Informazioaren Teknologien lizentziatura egin zuen Estoniako IT Collegen. Gaur, irakasle laguntzailea da Hong Kongeko Zientzia eta Teknologia Unibertsitatearen Bitarteko Konputazional eta Arteen irakasgaian (GZ).

Mar (Bartzelona) doktoretza egiten ari da, eta ikertzailea da Cudan-en, Tallinneko Unibertsitatearen Zinema, Baliabide eta Arteen Eskola Baltikoan, zeina adimen artifizialean eta arte interaktiboan zentratuta dagoen. Interfazeen kulturei buruzko masterra egin zuen Linzeko (Austria) Arte eta Diseinu Unibertsitatean. Halaber, artea eta diseinua ikasi du ESDIn, Bartzelonan, eta ordenagailurako jokoak garatu ditu Erresuma Batuko Central Lancashire Unibertsitatean.

Food Design Nation: elikadurarako etorkizun hobe bat diseinatzea, mundu-mailako elikagai-sorkuntzen interkonexioaren bidez. Mundu-mailako elikadura-sistemak birdefinitzen laguntzen duten diziplinarteko sorkuntzen arloan gehien hazten ari den komunitatea gara. Erronka jangarri konplexuenetarako esparruak diseinatzen ditugu, kulturan, historian eta errokek janariarekin, arteekin eta diseinuarekin duten harremanean zentratuta. Edertasun intelektuala elikatzen dugu, eta, horretarako, proposamenak eta jarduerak dokumentatzen ditugu aldizkako argitalpenen bidez, hausnartzeko edo hitz egiteko guneak sortze aldera. Janaria, guretzat, planetako balioak gure praktika nagusietan txertatzeko hizkuntza unibertsala da.

Nicole Vindel
Guatemalako jatorrikoa, Gironan hazi zen eta gaur egun Bartzelonan bizi da. Hiri horretan, narratiba artistiko berriak garatzen ditu janariaren inguruan, arlo hori egungo elikadura-testuinguruaren konplexutasunak eta ñabardurak aztertzeko aukera ematen dion bitartekoa baita.
Aldaketa gosez, Vogue España 2021ek argitaratu zuen bezala, bere lanean edertasun intelektuala eta formala uztartzen ditu kontzientzia kolektiboa sortze aldera. Diseinuaren eta ingeniaritzaren arloko prestakuntzatik eta goi mailako sukaldaritzako material aurreratuei buruzko ikerketatik abiatuta, gaur egungo kulturak sinbolismoaren eta pentsamendu kritikoaren bidez berriz konektatzea du helburu.
Random Happiness eta Food Design Nation kolektibo artistikoaren sortzaileetakoa den Vindelek modu aktiboan egiten du lan elkargintza-proiektuetan, eskolak ematen ditu Elisava, IED edo LCI unibertsitateetan, eta Celler de Can Roca, FoodCultura eta Tate Exchange-rekin ere lan egin du, besteak beste.

Idoia García de Cortázar

"Diseinuaren Gizarte Funtzioa"ren arloko masterra du, eta bai Innovation Strategies and Business Design Management arloko masterra ere Silver Economy deritzon ekonomia-alorrari dagokion testuinguruko Zerbitzu eta Zentro Gerontologikoak humanizatzeko espezialitatean.

Zenbait unibertsitate publiko zein pribatuko Berrikuntza Proiektuen irakasle eta zuzendaria da. (UB-Bartzelonako Unibertsitatea, Ramón Llull Unibertsitatea, IED, etab.)

Hainbat ikerketa-proiektu zuzendu ditu erakunde publikoentzat Silver Economy arloko hainbat eremutan: humanizazioa, berrikuntza eta kalitate-neurketa (Salut, CSI-Consorci Sanitari Integral, ICS-Institut Catalá de la Salut, Germans Trias i Pujol ospitalea, etab.), eta bai erakunde pribatuentzat ere (Vitalia Home Taldea, Domus, etab.).

Adinekoei arreta emateko eredu berrietan aditua da, eta, beraz, ikastaroak eta hitzaldiak ematen ditu (SEAUS - Osasun-sistemaren Erabiltzailearen Arretarako Espainiako Elkartea, Espainiako Geriatria eta Gerontologia Elkartea, CSIren Berrikuntza Jardunaldiak, etab.).

Humanizza enpresaren zuzendaria da; enpresa hori Silver Economy arloko zerbitzu eta produktuen kalitatea neurtzeko xedaturik dagoen aholkularitzaren eremuan espezializatuta dago, berrikuntza, Big Data eta Adimen Artifiziala (AA) inplementatuz.

  Mikel Gonzalez (Bilbo, 1978) Necsum Trisonen sortzaile, CEO eta sorkuntza arloko zuzendaria da. Necsum Trison teknologiaren bidez esperientziak sorrarazten espezializaturik dagoen estudioa da. Ingeniari elektroniko honek hainbat master ditu arte, diseinu eta EMBA (Executive Master of Business Adminisitration) arloetako zuzendaritzan, eta duela 3 urte eskas ekin zion ekintzailetza-lanari, gizartean, ohituretan eta kontsumoetan aldaketa global bat sumatu ondorik. Izan ere, ondasun materialak kontsumitzen dituen gizarte batetik esperientziak eskuratzeko asmoa duen gizarte batera igaro gara. "Bidaia gehiago egiten ditugu, maizago irteten gara afaltzera, lagunekin biltzera, azken batean, gure kontsumoa gehiago bideratzen dugu esperientziak bizitzera ondasun materialak eskuratzera baino". Mundu digitalaren zale amorratua da, eta diseinua, arkitektura, artea eta teknologia uztartzen ditu esperientzia digitalen sorkuntzarik doakion paradigma berri gisa, beren estudioan diseinatzen dituzten kontzeptu digital guztietan pertsonak balio-katearen erdi-erdian jarriz.

NECSUM TRISON

Necsum teknologiaren bidez esperientzia magikoak sorrarazten espezializaturik dagoen arte digitaleko eta entretenimenduko estudioa da. Erandion egoitza duen euskal enpresa honek berrikuntza, teknologia, arkitektura, diseinua, arte digitala eta, besteak beste, hiru dimentsiotako animazioa elkarrekin uztartzen ditu. Esperientzia digitalak garatzen dituzte A-tik Z-ra 100 herrialde baino gehiagotan, mota guztietako espazioetan teknologia txertatuz, arkitektura eta ikuskizunak eskainiz, museoetan, tenpluetan, parke naturaletan, monumentuetan eta beste hamaika espaziotan. Estudio hau munduko 10 estudiorik sortzaileenetako bat da bere sektorean. Horren erakusgarri dira Los Angeles, Shanghai, Londres, Las Vegas eta Amsterdam hirietan 3 urtetan jaso dituen nazioarteko 19 sariak.